பொங்கல் வாழ்த்துக்கள்..

விடிகாலை வேளை நீ எழுவதற்கென காத்திருந்தது..

என் உறக்கம் கெடக்கூடாதென்று

மெதுவாய் மெத்தை கலைத்துநீ சென்றாலும்

உன் கொலுசொலிகளின் மெல்லிசை எழுப்பிவிட்டது

என்னையும் காலைகண்விழிக்கும் பறவைகளையும்..

நீ சுற்றி வர, துளசிமாடம்

புண்ணியங்கள் சேர்த்துக் கொள்கிறது..

வாசல் தெளித்து கோலம் போடும் உன் முகம்கண்டு

வானமென்னும் மேனியெங்கும்

வெட்கங்கொண்டு சிவந்தான் சூரியன் - விடிந்தது...

மாக்கோலம் உணவுகொள்ள வந்த எறும்புக்கூட்டம்

உன் விரல்கள் மொய்க்க விரைந்தன..

வளையோசை வரும் இன்னிசை கேட்டு

நடனமாடியது நீ பற்ற வைத்த நெருப்பு..

புத்தரிசி களைந்த போது நீரெல்லாம்

உன் கைவிரல்கள் முத்தமிட்டு விடை பெற்றன..

புதுப்பானை பொங்கல் விரைந்தே பொங்கியது

உன் புன்சிரிப்பு இதழோரம் பொங்கிவரக் காண..

வானம் பார்த்து பூமி பார்த்து நீ வணங்கும்போது

உன்விழி தரிசித்து உன்நன்றி ஏற்றன அவையிரண்டும்...

உழவனும் இயற்கையும் உயர்வுபெற வேண்டுமென்ற

உன் வேண்டுதலும் ஏற்றான் இறைவன்..

உன் வேண்டல் முடிந்து என் வேண்டல் கேட்டு

கையில் உருட்டி நீ ஊட்டிய போது தான்

அப்பொங்கலும் இனிப்பு பெற்றுக் கொண்டது..

கரும்பும் தித்திப்புக் கூடியது..

அன்பென்னும் வாசம்வரும் உன் பாதம்படும்

இடமெல்லாம் என் வீட்டில்.. என்ற போது

எந்நாளும் தித்திக்கும் வாழ்நாளும்.. எனில்

ஒவ்வோர் நாளும் தித்திக்கும் தைப்பொங்கல் தானே எனக்கு..!

பொங்கல் வாழ்த்துக்கள்..

பூ விரல் வரைவில் புது வண்ணக் கோலமிட்டு..
மேனி தொடும் காலை கதிரவனைக் வாழ்த்தி விட்டு, உணவீந்த உழவனுக்கோர் நன்றி தந்து..
புத்தரிசி களைந்தெடுத்து..
புதுப்பானை பொங்கலிட்டு..
பொங்கி வரும் நுரைத்திரட்டு,
அதற்கிணையாய் குலவையிட்டு..
பொங்கலோ பொங்கலென பாடிவரும் அவளினிய குரல் கேட்டு..
வரிந்து கட்டிய வேட்டி பட்டு.. ஒடித்து கடிக்க கரும்புக்கட்டு, எனத் துள்ளிக் கொண்ட நானும்..

தெய்வத்திற்கு படையலிட்டு, யாருமறியாது கொஞ்சம் எடுத்துவிட்டு,
எனக்கு மட்டும் தனியாய்..
வாயில் ஊட்டிவிட்டு மெதுவாய்,

"எப்படி இருக்கிறது, நான் செய்தது" எனக் காதில் கேட்ட அவளிடம்,

தித்திக்கிறது.. காரணம் - கற்கண்டு அல்ல.. உன் கைகண்டு..

என பதிலுரைத்த காலம் போய்...,
வாட்சாப்பில் வாழ்த்துச் செய்தியோடும், ஃபேஸ்புக்கில் லைக்குகளோடும் கரைந்து போகிறது இப்பொங்கலும்..,.

தமிழ் மகளாம் தை மகள் கொணரட்டும் இன்பங்களை..

உங்களுக்கும் குடும்பத்தில் அனைவருக்கும் இனிய தைத்திருநாளாம் பொங்கல் வாழ்த்துக்கள்...